又買鞋 - STEVEN MADDEN

本身以為一次過買咗3對鞋, 呢一季都可以收手啦, 點知要退貨, 最終只係得一對, 一來我唔著慣高踭鞋, 不能長時間著會覺得好攰, 所以我決定點都要買多對平底BOOT, 就喺呢個時候, 我最愛的Blogger & Miss又放火, 佢參加咗Steve Madden 的 shopping event 仲影咗唔少相, 比我發現有對我超中意既平底BOOT!! 

我當時見到呢張相, 希望佢唔好介意我借佢張相啦~~

一見到我已經好想立即去買, 咁啱又要上堂就順便問一下對鞋大約幾多錢, 雖然佢唔係好記得大約價錢, 不過佢竟然送咗張 $350 cash coupon 比我, 真係開心到暈!!!!! 多謝晒呀ISA!!!

不過只適用於中環分店, 今日就約個朋友山長水遠出去見其真身, 一齊去試試, 到我見到真身想試的時候真係好失望 (並唔係因為鞋款問題或品質問題), 竟然我最中意嘅黑色39碼已經斷貨, 黑色最大只有38.5碼, 而啡色就有39碼!! 

SALES姐姐拎齊2個顏色比我試 (黑色38.5碼 & 啡色39碼!! ) 我今日著了一對比較厚身的棉襪, 所以著黑色38.5碼的時候真係好緊, 而啡色39碼當然就係好FIT好舒適, 但係一向唔會買啡色的我, 唯有好失望想放棄!!

不過呢個時候又比我發現另一對內藏踭波鞋, 雖然踭高都有3-4寸, 但係一試上腳的時候, 舒服的程度我係完全唔覺得自己著緊有踭鞋, 而且呢對仲做緊7折 ($1390 X 7折= $973), 雖然類似嘅款其實都好多牌子有出, 就算無牌子都有好多, 但係佢真係好舒服, 而且有7折之後都唔算好貴呀!!! 真係好有衝動要咗你, 不過始終我嘅主要目標買唔到, 心有不甘, 不肯落決定又不捨得離開!!

但係到真係到臨俾錢的時候, 我真係好唔捨得對BOOT, 我就問SALES姐姐對boot會否越著越鬆呢?? 佢話其實所有鞋款著耐了都會鬆一點!! 仲提議我試著絲襪再試試穿, 睇下會否有幫助, 仲立即提供一對絲襪比我試一下, 一試上之後真係舒服晒, 我立即忍唔住: 我要呢對!! 連我朋友都忍唔住笑我!! 今日原來都仲有PROMOTION, 買2對正價貨品會有8折優惠 (只係做埋聽日6/10), 但係因為上面對波鞋已經有7折, 所以唔算, 唯有用coupon $1890-$350 = $1540!!

其實啡色鞋頭反而有漸變色, 但係我個人都係鍾情黑色多一點!!

最終都係一次過帶埋對有踭波鞋返屋企!! 一次過買夠$2000做埋vip添, 以後正價都有85折, 每買$1就可以儲1分, 儲夠10000分就有一張$500coupon, 不過我唔記得問有無限期!! 做咗VIP買正價都已經有85折都幾好, 不過可能係一件好危險嘅事!! 哈哈!! sales姐姐仲送咗張75折coupon比我, 不過只限於上網買, 網址係: http://www.centralcentralshop.com/ 限期到10月尾, 而且上網買嘅分同喺舖頭買又係分開計, 呢樣就覺得唔係好公平~~ 不過我真係買夠啦(暫時!!) 所以將張coupon轉送比朋友啦!!