我家大少今年升小一啦~

我家大少Evan要升小一, 學校要早幾日開學比佢地小一生返去適應下, 所以我就帶佢去剪頭髮準備開學, 因為佢D頭髮本身又長得快又太曲, 所以我盡可能都會同佢剷到好短,靚仔嗎??

臨返學之前影返張靚仔相先~~

呢間就係"博愛醫院曆屆總理聯誼會鄭任安夫人學校", 對我嚟講係好有親切感, 因為我都係呢間學校嘅畢業生, 喺呢到我都生活咗6年好快樂嘅日子, 仲認識咗一班好同學同老師, 到而家都仲有聯絡架, 希望Evan都會啦!! 加油呀!!!

已經好多年無正式返去啦, 今次連我都好緊張, 一來要提醒自己唔可以做怪獸家長, 另一方面又擔心佢能否跟得上進度, 仲慘過係我升小學咁!!

不過第一日返學, 原來學校唔接受同學仔兩邊剷青的髮型, 唯有立即帶佢再剷短D啦~~ 其實當佢班主任通知我佢的髮型唔合格的時候, 我真係有少少不滿, 因為我之前已經上學校的網址睇過有關校服等等資料, 但係都無提及過髮型有呢個限制, 我覺得學校應該係早一點通知家長, 因為大多數家長都會喺開學之前為子女去準備有關開學的事, 而家變咗我剛剛剪完一次又要再剪, 不過算啦, 學校係我揀, 我一定會盡量配合學校要求嘅~